Ilang mga Bisita Mula Baguio hanggang Kyusi

Tinipon sa manuskrito ang mga piling tulang naisulat sa loob ng halos pitong taon, sa magkakaibang lugar—ngunit pinakamarami sa siyudad ng Baguio kung saan pinakamatagal na nagbase ang may-akda—at sa magkakaibang disposisyon at antas ng maturity sa pagtula at paggagap sa lugar at bisa nito sa lipunan. Mababakas sa mga tula ang magkakaibang rehistro o tono at mga tiyak na kaganapan sa lipunan—pagdukot kanila Karen Empeño at Sherlyn Cadapan, pagtanggal sa puwesto kay Ma. Lourdes Sereno, Maguindanao Massacre, at iba pa. May ilang tula ring nauna nang binasa sa mga open mic at iba pang aktibidad sa Baguio: Third Monday poetry readings sa Mt. Cloud Bookshop, commemoration noong 2017 at 2019 ng Ampatuan Massacre, “ghost readings” sa bisperas ng Undas para sa mga biktima ng tokhang. Kung gayon, hindi ikakaila ang tindi at lalim ng imprint ng siyudad ng Baguio—na siya ring lunan ng pagkamulat at pagyabong ng poetika at politika ng may-akda—sa koleksiyong ito. Subalit hindi akmang ilarawan ang koleksiyong ito bilang tungkol sa Baguio; bagkus, ang Baguio ay kongkretong sityo ng may-akda at ng pagsisimula at pagyabong ng pangkulturang sensibilidad nito.