Panawagan sa mga Malikhaing Akda sa Korapsiyon at ang Maraming Mukha Nito
Nagngingitngit ang bayan, kailangang sundan.
Panawagan ito sa mga manunulat, mandudula, makata, at kuwentista sa iba’t ibang larangan na mag-ambag sa isang espesyal na isyu/antolohiya na nakatuon sa isang napapanahong tema: korapsiyon. Hinahanap namin ang mga akdang sumasalamin sa maraming anyo ng korapsiyon — politikal, panlipunan, pang-ekonomiya, pangkultura, espiritwal (iyong nakatutok sa di alam ang tama sa mali, walang kakayahan sa discernment), at maging personal ngunit kaugnay ng sistemikong karahasan ng korapsiyon — gamit ang imahinasyon at sining ng salita at higit pa rito ang salalayan ng kasaysayan.
Turon at walis-tingting na nagkakahaga ng milyon, bribery (Flood control at kontraktor), embezzlement, extortion, graft, nepotism, ghost employees, pork barrel, junket ng mga opisyal-publiko, confidential funds, at iba pang mga isyung pumutok sa ating lipunan ay maaaring paksain. Mayroon mang mga akda na personal ang atake, maghahanap pa rin ang mga editor ng sistemikong ugat ng mga isyung ito.
Tumatanggap ng mga akda sa lahat ng uri ng panitikan, kabilang ang:
- Tula – Liriko, spoken word, o tulang nagsasalaysay tungkol sa epekto ng korapsiyon sa araw-araw na buhay.
- Piksiyon – Maikling kuwento, dagli, o bahagi ng nobela na nagbubunyag ng korapsiyon sa pulitika, pamilya, komunidad, o sa puso ng tao.
- Sanaysay at Malikhaing Di-piksiyon – Personal na salaysay, makatang ulat, o mapagnilay na akda hinggil sa katotohanan, kompromiso, at moral na tunggalian.
- Dula – Isang-eksena o maiikling dula na itinatanghal ang epekto ng korapsiyon sa pampubliko o pribadong espasyo.
- Panitikang Pambata at Kabataan (YA) – Mga kuwentong pumapansin sa isyu ng korapsiyon sa paraang angkop at makahulugan para sa kabataan.
- Eksperimental at Hybrid na Akda – Biswal na tula, “found texts,” metafiksiyon, panitikang lumalabag sa tradisyunal na anyo upang ilantad ang mga nakatagong istruktura ng kapangyarihan at pandaraya.
- Salin – Mga salin mula sa ibang wika na tumatalakay sa korapsiyon, kalakip ang tala ng tagasalin.
Layunin nating ipakita na ang korapsiyon ay hindi lamang sakit na pulitika o lipunan, kundi isang kalagayang pantao na dapat harapin, labanan, at baguhin.
Sumama sa paglikha ng koleksiyong magpapatotoo sa iba’t ibang paraan kung paanong hinuhubog, sinisira, at hinahamon tayo ng korapsiyon—at kung paanong ang panitikan ay maaaring magbunyag, magtanong, at magpabago ng sistemikong karahasang ito.
Ang huling pagsumite ay sa 31 Oktubre 2025.
Paalala:
1. Para sa mga akda liban sa tula, inaasahan na naka-encode o kompyuterisado, doble-espasyo, at gumagamit ng font na Times New Roman na may laking 12 puntos at maglagay ng maikling sinopsis na binubuo ng hindi lalampas sa 300 salita o maaring maglagay ng susing salita.
2. Maaaring lakipan ng biswal na materyal (may kulay o black and white) gaya ng orihinal na larawan, ilustrasyon, graph, matrix, mapa, at iba pa. Tungkulin ng awtor na kumuha ng permiso sa anumang materyal na may karapatang-ari.
3. Maglakip din ng maikling tala sa sarili (Bionote) na naglalaman ng kasalukuyang akademikong posisyon, digri, kinabibilangang larang, espesyalisasyon, pinakabagong publikasyon, pananaliksik at iba pang mahahalagang impormasyon.
4. Ang akda /mga akda ay hindi dapat naglalaman ng pangalan o anumang pagkakakilanlan gaya ng institusyon at kontak na numero sa halip ay sa pormularyo lamang ang mga ito makikita.
Mga inaasahang isusumite:
- Agos Journal Pormularyo ng Awtor (PDF): Apelyido-Pangalan_Pormularyo
Halimbawa: Sabangan-Lari_Pormularyo
- Bionote (docx): Apelyido-Pangalan_Bionote
Halimbawa: Sabangan-Lari_Bionote
- Akda na nasa docx at PDF (Walang pagkakakilanlan): Genre_Pamagat ng Akda (Kung mahaba ang pamagat ng akda, ilagay lamang ang una hanggang ikatlong salita.
Halimbawa: Maikling Kuwento_Nang Minsang Tumakbo
Ipasa ang lahok na akda sa email na ito: agos.swf.upd@up.edu.ph at ilagay sa subject line ang Apelyido-Espesyal na Isyu-Agos 2026
Para sa karagdagang impormasyon, makipag-ugnayan kay G. Lari Sabangan sa email ng Agos (agos.swf.upd@up.edu.ph) o tumawag sa (+632) 8924-4747 o (+632) 8981-8500 lokal 4583. Maaari ding bumisita sa 3/P Sentro ng Wikang Filipino UP-Diliman, Gusali ng ISSI, Virata Hall, Kalye E. Jacinto, UP Diliman, Lungsod Quezon.